السلام عليكم صديقاتي الجميلات صديقات مدونة إنتي..
كل عااام وأنتن بخير ...بدأت التحضيرات والتجهيزات لعيد الأضحى المبارك,,أعاده الله علينا وعليكم بالخير والبركات..
النهاردة جبتلكم طريقة سهلة جدااا عشان نعمل اكياس لهدايا وتوزيعات العيد..تعالوا نشوف ايه المطلوب...
الأدوات المطلوبة:
1-أكياس هدايا صغيرة
2-مقص
3-ورق أبيض واسود
4-صمغ
5-قلم رصاص
الطريقة:
*بالقلم الرصاص هنرسم على الورقة البيضاء شكل الفرو بتاع الخروف اللي هو زي شكل السحاب كده..واحدة صغيرة للوجه وواحدة كبيرة للجسم..سهل جدا..
*وعلى الورقة السوداء هنرسم وجه الخروف زي الصورة..كمان سهل جدا
*بالمقص بقى هنقص اللي رسمناه دة مظبوط ونخلي بالنا عشان نقص أد الرسمة بالظبط..
*بعد كدة هنجيب الكيس وبالصمغ نلزق وجه الخروف اللي بالأسود وفوقه الفرو الصغير بتاع الوجه زي الصورة:
*هنا احنا لزقنا الجزء الصغير بتاع الفرو بس واكتفينا بكدة لكن انتو تقدروا تلزقوا كمان الجزء الكبير بتاع الجسم عشان يكون الخروف كبير وكامل..وبكدة نكون عملنا كيس هدايا للعيد بأبسط الامكانيات وأسهل الطرق وكل سنة وانتم بخير ياحلوين...
